Dopi lontan travay la tèr na poin in bon répitasyon : li lé fatigan, lo rannman la pa si tan tèlman bon par rapor la fatig i mète dann out kor… Si tèlman ké lo piosh, in zoutiy i ansèrv bonpé dann travay la tèr, demoun i apèl sa « gongon-d’soufrans », o sinonsa « gongon d’mizèr ». Désèrtin, pou kass ti-boi, i apèl sa galman gitar pars kan i tap dsi in tèt lo rosh i paré sa i fé la note « la » - mi vann konm moin l’ashté ! Kan i di in moun sé in ralèr d’piosh sansa in alèr d’piosh, sa la pa in bon konpliman. Poitan, alon kalkil in kou ? Sé pa piosh lo gongon d’mizèr sé lo trépé d’rovni ké ou I tir la-dan ! Sé pa piosh lo gongon d’soufrans, sé lo kondisyon ou manyé ali dann poikan solèy zanvyé. Kosa zot I anpans ? Arien ditou ? Fé travay z’ot koko ! Fé bouy z’ot matyèr griz ! Zot va oir ké rant-rant, ni pé z’ète, tazantan, dakor rantre nou.