Mi koné pa si zot I rapèl shanté la. Sa I komans a daté pars sirman sa in shanté dann tan la guèr. Mi koné pa son parol pou vréman, mé sak mi rapèl sé lo pti bout rofrin té i di konmsa : ayayaye ! Koute amoin zot tout, goni vid i tienbo pa d’bout.

Moin la antann souvan bann moun la konète la guèr anparl la fain é dann tan la manzé té rar konm korn lapin, si tèlman ké kan out vant lété vide, mi pé asir azot ou téi fé pa lo fyèr. Moin la pa konète lo tan la guèr, mé moin la konète lo tan bann marmaye téi vien l’ékol vant vide é anplis lo vant amayé avèk lo vèr.

Si l’avé poin konm i di inn bone am pou sokour azot in pé zot té mal : lo d’sèl téi sifi pa pou fé arète lo vant grouyé, in boushé d’ri té pa non pli lo mal véni si zot té i kroiz in moun konpatissan. Alé ! Mi lèss azot rofléshi la dsi é ni artrouv pli d’van siptadyé.

Justin