Mézami, kan téi koz avèk bande vyé lansien lété pa rar la konvèrssassyon téi tourn otour d’lo manke manjé. Koméla i parlré plito dsu lo tro d’manjé mèm si i fo rokonète néna in bonpé kréol lo bouzaron lé vide ankor zordi.

Mé dann tan, bonpé noute zanssien téi soufèr la fain. Si tèlman ké lo mayi téi manz dopi A ziska Z : mayi d’ri li, mayi soso li, lanmsime li, lo son li, ziska la zèle téi manz. Dori té pou lo tan vash grass é la vyande lété rar konm korne lapin.

Zordi ankor bonpé d’moune i majine sa avèk la krintiv la fain i rovien ; mé si li rovien mi pans sar pars l’avé tro lanspèk dsu noute lotonomi alimantèr. Mé nou va anparl sa ankor.
Alé ! Rofléshi bien la dsu é ni artrouv pli d’van. Sipétadyé.

Justin