Na dé foi ou lé a d’mandé koman i sa fé pou ranpli in bèl tono avèk in pti pisa d’lo. Pars kan ou i rogard bien ou i apèrsoi lé pa an proporsyon. In pti pisa d’lo pou in tono talèr néna dé san lite dolo ? Sa sé in n’afèr lé pa posib. Poitan, avèk lo tan, ou i rann aou kont momandoné tono lé fine plin. Dan la vi lé konmsa ! I fo pa ou i pans tout z’afèr i fé an vitèss. Dabor pars la vitèss néna son tan épi pars konm i di, la pasyans i géri la gal. In provèrb sé in provèrb épi konm tout bon provèrb li néna in sans dann la sosyété é i fo pa ni obliy néna in kozman i di : « Pasyans avèk longèr d’tan lé pli for la fors épi la raz. ». Alé ! Mi lèss azot rofléshi la dsi é ni artrouv pli d’van sipétadyé.