Mi pans, konm moin, zot la fine antann, souvan-défoi, demoun apré di an parlan d’inn pèrsone : « Sa in gouté-largué ! ». Sa la pa in konpliman ! Akoz, sa i vé dir la pèrsone i larg lo kor fasilman shak foi èl i tonm dovan in difikilté. Biensir, sa la pa in bon manyèr pou sirmont bann difikilté d’ la vi. Poitan nout sosyété i arète pa produi bann gouté-largé kisoi dann l’ékol, kisoi dann travaye, kisoi dann la vi d’famiy é dann tout sak la bézoin in bone doz la pèrsévérans pou réisi. Fé in n’éfor ! Tienbo larg pa ! Ni pé di sé bann bon prinsip, mé na poin in bon répitasyon dann nout sosyété... I vé pa dir si ou l’apré fé in kouyonad, i fo kontinyé, pous dési. An kontrèr, i fo kalkil in kou épi si lé nésésèr shanj manyèr san ronons out projé si sé in bon projé ébin ou i shanj shomin pou arivé. Alé ! Mi lèss azot réfléshi la dsi é ni artrouv pli d’van sipétadyé.