La plipar d’tan, gouvèrnman la droite i sèy fé kroir anou tout sak zot i fé lé kalkilé, lé prévi, zot la fine tir lo plan.. Fèr kroir, sé in métié... mé vitman-vitman, ni an apèrsoi la droit i tronp ossi : souvan dé foi, son kalkil lé fo, li la pa prévi inn-tiork, son plan lé mal tiré. La plipar d’tan, akoz sak nana lo pouvoir, i koné pa pou vréman koman demoun i viv an vré.

Zot la antann parl lo zistoir bonus-malus ? Si ou i ashté in loto na in pti motèr, i polié pa tro, i kado aou in bonus. Si ou i ashète in bèl bébète loto avèk in gro motèr, i polié plis, i mète aou in malus, dann zansiv... D’apré bann « mi koné tout », bann gran kalkilèr, bann planifikatèr gabié, bann moun la droite, lo malus : laté pa bézoin tir in pti katsou an plis. Ay ! Ay ! Ay ! Mank de po ! bann moun l’ashté plis pti loto gouvèrnman té i mazine é moin bèl bébète loto gouvèrnman té i kroi. Ala lo mézir va kout 200 milion l’euro pou lané 2008. Sa lété pa prévi !

A bon ? Kissa l’otèr si gouvèrnman i gingn pa gouvèrné ? Gouvèrné, sé prévoir, non ? Konm bann Ousanousava i di : « Gouvèrnay, sé gouvèrnman » Sa lé bien vré !

Justin