Oté ! L’État i okip zafèr i rogard pa li ! Li bour son né dann sak i doi pa konsèrn ali ! Pli pir, li mète son kiyèr sal dann manzé i kui pa pou li ! Kan ou sé in bon kapitalis, in bon "libéral", in moun "modèrn", ala koman i koz, ala koman i doi kozé !
Zot l’apré sèy konprann kossa mi vé dir ? Bin lé sinp : banna i di konmsa, i fo pa gouvèrnman i mèl dann lékonomi, i fo li lèss bann moun i koné lantropriz fé z’ot biznèss, grossi z’ot pla, goumant z’ot taux de profit... Sa sé z’ot loi, sa z’ot katéshis, sa sé z’ot rolizion ! Biensir, pou moin, sé in mové règloman épi i fé sobat kont sa.
Mé zot, kossa zot i fé kan, fors-a-fors mal diriz z’ot bato, sète-la lé riskab koulé ? Pa bann pti-pti bato mé bann gran, bann mastodonte, bann king-kong lékonomi ! Bin zot i kri o sokour, zot i domann l’asistans. Zot i domann k’i ède azot, mé kissa ? Boug oki na poin frékantasion, bann kapitalis i bouz pa pti doi. Alor l’État, konm Zoro, i ariv épi sé li k’i rashète lo kanar boité, lo kanar kass-in-ki, épi sé bann ti-kolon k’i pèy pars apré na pi larzan pou lo sosial. Sa la fine ariv dann l’Angleterre, dan la Frans, sa i sort ariv dann l’Amérik.
Alor, kan lo zafèr lé bon, in pé i bate déssi léstoma, i fé lo fièr, i fé vantar, mé kan i gaz pi, i dovien assisté. Zot ossi zot i tonm dann l’asistans, zot i trouv sa lé bon, konm lo sal i angrèss bien koshon.

Justin