Mé zami, moin la fine viv in bon koup de tan. Si tèlman sak i rèss pou viv lé sirman pli kourt sak moin la fine pass dsi la tèr. Lé konmsa, lé konmsa é na poin pou trakasé ; lo zour v’arivé pou lèv lo pyé é zour-la va lèv lo pyé . La vi sé sa !

Mé par l’fète la pa dsi sa mi vé anparl azot. Mi vé anparl azot dsi gouvèrnman La Frans, in gouvèrnman n ou lé blijé siporté vi k’la pa nou la shoizi ali. Mé an touléka, mi koné li lé kapab… Fé prann a nou po d’shanm pou pla kouvèr, makaroni pou la bouji, savon pou fromaz.

Si mi rapèl bien, dann mon zénès bann la droit-la nou téi apèl sa MRP-Sin-Lé téi apèl sa bann fasis !-An touléka, zot pli gran tré d’karaktèr sé ké zot lé mantèr konm in rashèr d’dan, dsi zot program, dsi sak zot i apèl zot réform é tout lo tranbléman. Dayèr i oi sa bien dsi la réform rotrète é sak i tienbo azot o kouran i oi bien : nout zoinal la déza an parlé é la pa zordi mi sava anparl sa dann détaye. Antouléka sak moin lé sir gouvèrnman-la li gouvèrn pou lo in pur san bann rish rish mèm, pliské rish.

Parèye pou réform lo fran CFA : bann moun l’afrik i vé fini avèk sa, donk Macron i mont dsi zot shoval épi li sava dann l’afrik mèm konplis avèk bann maryonète li la mète o pouvoir pou détourn la réform. Nou va rovir la dsi san tardé pars so kou isi mi pans li nora fortafèr avèk bann jenn l’Afrik. Pars banna la di zot l’asé èk sa é kan mi di l’asé la pa a moityé é mésyé Macron mi pans va antann parlé.

Moin té anvi dir gouvèrnman nou néna sé in gouv èrnmann sharjèr d’lo, mé la pa sa, sré plito in gouvèrnman pou lo gran kapital é fyèr pou son bann mové z’aksyon.