Si mwin lété gouvèrnman Langlétère, donk si mwin lété pa bète é méshan, mi diré azot mi prandré inn-dé déssizyon késtyonn rékonsilyé in pé avèk bande shagossien.

I sifi pou sa mi rogarde in pé dann mon rétrovizère é sa i doneré amwin bon-bon zidé. Dann mon rétrovizèr pars néna kék zané gouvèrnman anglé la négossyé avèk bande shagossien in plan pou lo rotour. Toute téi roul ron é o rotour bande shagoss lété prévu, kalkilé, é té paré pou réissir.

Ziska Théréza May, in shèftène an parmi bande bète é méshan la désside lo rotour té pa possib é èl va konpanss sa par in don larzan. Lo mouvman chagos lété si tèlman an kolèr ké li la fé son raproshman avèk gouvèrnman morissien é final dekonte la mète GB an difikilté dsi lo plan internassyonal.

Astèr konm i fo komanss par in boute, si mwin lété, ni bète ni méshan mwin noré :

– Propoze bande shagossien, shake ané, kan i ariv promyé novanb in léspédission dann péi natal pou alé onore in pé lo bande mor : rofé la propté bande tonb, flèri azot, épi pass dizon in somènn dann bannzil. Pou in grande puissanss konm GB sa la pa vréman kékshoze inpossib.

– Propoze bande jenn shagossien souvan défoi dann shomaze in lanploi dsi la baze é an préféranss par raporte demoune lé zot nassion.

– Par raporte gouvèrnman morissien mwin nora – si mwin lété pa bète é méshan – in kontra pou la ko-jèstyon bande zil chagos, zordi lékonomi lé an stand-by.

Finalman i sifiré d’ète bone volonté pou ariv in rézilta satisfézan. Sof atande k’in zour la rou i tourne é kan la rou va tourné gouvèrnman GB, gouvèrnman bète é méshan, va rotrouv ali kamu, la ké rante lé pate, onté konm in ronar in poul noré trapé.

Justin