Sé tan isi i parl in pé lotonomi La Rényon. Moin la antann in shèf la droite apré parl lotonomi ékonomik. Moin la antann galman désèrtin moun apré parl lotonomi dann lénèrzi épi lotonomi alimantèr. Tout fason, pou moin, néna arienk in parti la parl konm k’i fo l’otonomi La Rényon é sé nout PCR. La prèv pou moin ? Moin la pa antann okin parti, okin mouvman pou anrishi lo déba konm nout parti la fé.
Mé la pa pou sa mi ékri zordi. Zordi mi ékri pars moin la antann in moun bone volonté apré di : « Li épi son mouvman lé pou l’otonomi dann l’énèrzi épi l’otonomi alimantèr, an atandan d’oir, pli tar, si l’otonomi politik lé nésésèr réklamé ». Lé domaz, so moun-la la pa pou vréman in lobsèrvatèr la vi politikla Rényon pars si li lété, mi pans li noré konprann lo kèr d’lite kont lo kolonyalis-néo si zot i vé-sé l’otonomi dann nout désizyon.

La prèv : in bon légzanp lotonomi dann l’énèrzi : kroir gouvèrnman kolonyal droit konm gosh i aksèp sa gran kèr, sé kroir Père Noël. Pars si l’avé kontinyé la politik Paul Vergès la améné, zordi nou noré fine trap lotonomi dann lénèrzi. Rapèl anou bien :
Lidé-la, téin lidé konsèye réjyonal la mète anlèr avèk plizyèr tik-tak pou trap sa : solèye, lo van, dolo, la mèr, volkan, la byomass épi an mèm tan mète atèr bann lénèrzi sal. Zot i konpran sak mi vé dir : si nou téi ansèrv so bann baz-la nou narté pa loin zordi nout bi. Mé kisa la kass sa ? Gouvèrnman La Frans pars li té apré amenn kanpagn pou Didier Robert, an konplisité – obzéktiv i di sa- avèk parti sosyalis.

Gouvèrnman, La frans la démont pyès par pyès sak konsèye réjyonal é la plipar d’tan li la zoué dsi in problèm konpétans li la tir sa avèk La Réjyon, li la pran sa pou li, li la mète l’EDF dann son trin. Firamézir nou la vi arète léspèryans lénèrzi volcan, lénèrzi la mèr, la klimatizasyon par lo d’mèr… ranfors la par sharbon dann nout prodiksyon kouran, ranfors la par gazoil é lo rèss. Nou té an avans é oila ni tonm an rotar so kou isi.
Éskiz amoin di in pé sé shoz-la, vitman, vitman, mé si nou na poin in l’instans désizyon pou mète an avan lo dé lotonomi moin la mark an-o la-lénèrzi épi la sékirité alimantèr - avèk in fon larzan pou dévlop lo péi, kont pa dsi, ni inn, ni l’ot. Gouvèrnman néoKolonyal va kontinyé roul anou kari sou d’ri.