Matant Zélida la ékrir Justin :

Mon shèr nové, mon spès salté, rouj-de-fon dovan l’éternité,
Z’ot la p’asé fé lo zoizo dé mové z’ogir ? Zot la p’asé fé l’anons bann katastrof ? Solon zot, lo réshofman klimatik sé pou domin matin, lo rolèvman nivo la mèr sé d’isi pé. Zot i rokoné zot mèm i koné pa kèl otèr lo lo v’arivé, é zot l’apré fé pèr d’moun dsi lo NRL… L’èr ké, solon zot, la pi asé zargiman z’ot koté, ala ké zot i apèl zournal La Rényon o sokour é ala ké lo l’il La Rényon i mète a anons, li galman, lo katastrof. Boudikont, ni lo zournal dé l’il, ni zot mèm lo bann rouj-de-fon i ko, né kosa i sava éspasé é konm zot i koné pa, sa i anpèsh pa zot fé pèr lo moun. Arète in pé ! Kan ou lé pa sir in n’afèr i sava arivé, ou i kriy pa sa dann zorèy domoun sinonsa ou sé in z’anonsèr fos nouvèl. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr,
Na lontan le mond i koné lo klima apré shofé, nivo la mèr l’apré monté, é plizyèr kartyé dann La Rényon lé dann danzé. Matant, sak mi sava dir aou lé vré : oplis i sava, oplis bann péi i éloign in pé zot z’instalation par rapor la mèr. Isi kosa i fé : na in rout éstratézik, é i mète ali dan la mèr san savoir si sa i tienbo si sa i tienbo pa. Kosa v’arivé domin, apré domin sansa apré apré. Zot la pa la avèk sa !
In pé partou demoun i dévlop lo train, i tash moiyin an avoir dé-troi moiyin pou sirkilé késtyonn pa mète tout zèf dann mèm panyé… isi inn mèm i diré l’asé pou zot pars zot matyèr griz lé pa tayé pou oir pli loin ké lo bout z’ot né. Donk domin, si i fé lo NRL, si in bèl bébète siklone i ariv, sansa in bèl Tsunami, si i kass lo pon di nor, é bin va pran la rout La Montagn, ké lé arienk an tourné-viré, an biskankoin, é lo moun lé fatigué avèk sa kan tout lo sirkilasyon lé baskilé par la montagn.
Arzout èk sa i koné pa konbien sa i sar kouté é gouvèrnman li mèm, si tèlman li la pèr lo rézilta, la désid mèm pa kalkilé, li fèrm son zyé é sa i sifi ali. Nou ni kriy, si par malèr i fé lo NRL, aprésa ziska la fin vintéinyèm syèk i gingn arpi fé kékshoz konsékan. Gouvèrnman sosyalis i sousyé mèm pa vérifyé si tèlman zot lé avèk la droite isi La Rényon konm k’i diré Boné blan é blan boné. Tok ! Pran sa pou ou !