Mézami Olivier Bancoult-noute frère, noute kamarade – i rapèl sa souvan-défoi dann son bande konféranss. Li rapèl dann bande zané 70, gouvèrnman anglé la désside déporte toute bande zabitan bande zil chagos sinploman pou lèss bande zamérikin fé in gran baze militère dann lil Diégo-Garcia. In gran baze militère, inn an parmi bande pli gran baze militère bande zamérikin nénan dann péi étranjé.

Mé akoze déporte lo bande zabitan ? Alé oir lo baze i okipe solman lo tiers lil Diégo Garcia – é i rèss ankor dë tiers pou bande zabitan résté. Akoze déporte bande zabitan Perhos Banos, alé oir néna 140 miles – donk 225 km rante Perhos Banos épi Diégo ? Lé pli loin ké la Rényon Maurice. Parèye pou Salomon, troi frère galman.

Dann lil Guam demoune i rèss ziss koté la baze amérikène, parèye pou Okinawa, parèye ankor pou d’ote baz amérikène. Alor pou kossa sak lé vré partou lé pa vré pou Chagos ? Biensir i pé fé in érère, mé in lérère sa i répare.

Dopi sinkantan talère bande shagossien i viv dsi bande téritoir déportassion é néna poin d’rézon pou sa. Gouvèrnman zanglé li même la propoze lo rotour bande chagossien dann Chagos – la anvoye zékspèr pou sa – épi final de konte Madame Théréza May la vyol son parol é la panss téi pé ashté bande shagossien(e) avèk kèke milyon live sterling.

Na poin lontan la roganize in pétission adréssé prézidan amérikin – Obama – pou dire ali bande shagossien i konpran pa lo latitide GB épi li même. Obama la di sa i rogarde pa li, koze avèk gouvèrnman Gb é sète-la la pa bouzé.

Bète é méshan mi di azorte bande gouvèrnman zanglé.

Justin