Mézami,

Dann bande zané 1960-1970 l’avé la guère froide rante bande grande puissans é oila ke GB (Langlétère) i désside fini avèk son bande koloni. Parlfète lété pa pou fini réèlman mé konm i di, sorte par la porte épi rante par la fénète. An Kontinyan lésploitassion é an même tan arète dépanssé pou la po patate.

I fo dire, Langlétèr téi sorte la guère 1939-1945 in pé afayi, é in pé o flan mé èl téi vé konsèrv son ran Grande puissans é pou sa rokonstityé son larmée avèk bande lékipman modèrn – in légzanpe, ékipe son sou-marin avèk fizé pollaris. Sa lé modèrne, mé i koute shèr, é larzan i trouv pa sou la pate shoval.

L’amérik i vé absoliman fère fass l’URSS é pou sa konstrui bande baze in pé partou dsi la tère pars téi vé kontrol lo monde antyé konm promyé puissans ékonomik épi militère.

Langlétère i propoze bande zamérikin dë landroi dann loséan indien pou fé son baze : Aldabra (zordi téritoir séséloi) épi Chagos é dann Chagos lil Diégo Garcia. Bande éspéssyalist la parti vizite lé dé landroi… Aldabra in landroi néna bande tortu zéan é bande zamérikin la pa vouli pars i fo pa alé annuire bande tortu konmsa. Diégo-Garcia in landroi idéal pou vérouye loséan indien

Mé l’amérik in pé trakassé pars néna d’moune é bande zanglé i réponde zot va règ sa vitman-vitman pars la pa demoune pèrmante, ziss bann travayèr kontraktyèl i vien pou lo kopra mé i abite pa la. In mansonze pli gro ké zot tète pars l’avé dmoune an permanans dopi 1784 avèk la franss é dopi 1814 avèk langlétère.

Ala ké l’amérike la domande déporte bande chagossien é sé GB la fé lo sal boulo é sé konmsa bande chagossien lété déporté lil Maurice, Sésèl mé la plipar dann lil Maurice. Mé zordi ankor kan i fé film dossi Chagos i oi koman bannzil-la té okipé par son bande zabitan, in labitassyon pèrmanante pa bande travayèr okazyonèl.

Konm i di mansonze néna la pate kourte, é manti zordi sé pou fé trape aou domin. Gouvèrnman zanglé, gouvernman bète é méshan.

Justin