Somenn isi moin la parti marshé forain é mi pé dir azot sak moin l’ashté la kontant amoin si mi pé koz konmsa. Akout plito : gouyavyé déor, piman moris, zognon d’linn, l’aye déor galman, san konté ponm tèr isort La Frans, étsétéri, étsétéra, la ké lo ro.… Moin la trouv galman ziska bann pti séréal konm sonz, kanbar, patate tout koulè é i jirré pa, mésanm pou moin sa i sort in pépartou é pa arienk isi shaé nou.

Lo ka k’la intérèss amoin plis sé lo gouyavyé. Zot i koné sa lété, in bon koup de tan, in plant anvayisant, batizé pèst vézétal. Momandoné bann tèt do zèf l’avé komans diskite pou oir si i f opa arash tousa bann plantaz la. Kan bann plantèr la vi l’avé in l’anbéli dsi la prodiksyon gouyavyé zot la lans z’ot prodiksyo gouyvyé bio. Mé, in pé la profite lo nouvo sityasion é zot la inport gouyavyé déor par santène de tone san domann kontrol dsi lo plantasyon, konm dsi la métod kiltir, konm sak i apèl lo trasabilité-suivalatras si zot i vé !- lo produi.

Bann plantèr gouyavyé La Rényon la fé in rényon pou domann in labèl dsi lo pti frui rouj nout péi. Pars zot i san lo danjé i i pé vnir é zot i pans lé posib lo l’invéstisman zot la mète dodna lé posib ète fouti. Lé sir k’i fo dévlop in filyèr, lé sir galman i fo amélyor bann téknik prodiksyon, mé sré rajann oir in n’afè nou téi ramas dann la foré san dépans arien, ète ruiné par in bann z’inportatèr véré.

NB Figuir azot, na in dalon la fé pran pou moin inn-dé pyé gouyavyé. Moin lé v réman kon tan pars sa i rapèl amoin lo tan moin lété marmaye. Mé antansyon, la pal o pyé lo pti frui rouj mél o frui blan é zot i pé kroir sa i rapèl amoin souvnir. Zot osi pétète ?