Donk kan téi i di sa in moune néna in métyé konmsa sé plito in kassaz pti boi.. si anpliss wi di li lé gra konm in négossian patate, sa i vé dir li lé plito mèg ké bien portan.

Mé zordi, d’apré mwin lé shoz l’apré shanjé é patate sé in ravaz k’i komanss d’ète roshèrché. Patate sa i manz pi solman bouyi, mé préparé in pé toute sorte fasson.. Mi koné in péi laba dann l’afrik-lo Burkina faso — i fé d’pin avèk in mélanz la farine épi la poude manyok épi patate-inn fason pou pa gaspiye in marshandiz lé shèr pars lé inporté..

Lé pa rar dann bann kour la patissri, sansa la kuizine, patate i fé lo fyèr. Patate sé in védète zordi kissoi patate blan, patate karote, sansa ninporte kèl kalité… Donk zordi kozman mwin la di i shanj de sanss : patate néna son pri. Lé pa konm piman sansa tomate défoi i fo apèl azot méssyé osinonsa madam, mé kamèm li lé roshèrché.

Alé ! Mi kite azot rofléshir dsi lo shanjman d’gou demoune La Rényon, dsi la kalité bann ravaz a la modé é ni retrouv pli dvan sipétadyé.

Justin