Oté

Gran késtyon ! solisyon inposib ! Koman tienbo l’atansyon bann zékoutèr

Justin / 12 septembre 2019

Mi koné pa si zot la fine kalkilé kosa i spass dann léspri in moun apré ékout in diskour-pa in kozman rant familyé, mé in diskour pou vréman. Pars dann in konvèrsasyon rant familyé lé pli fasil suiv la konvèrsasyon.Pou kosa ? Pars rant familyé, i koz par pti sékans é kan inn i réponn l’ot é kant inn i ropran sak l’ot la di,sa i domann pa in gran diré dann lo latansyon épi dann l’ékout.Ni pé pozé , dékolé, pozé dékolé san mète dézord dann lo kozman dé zinn épi dé z’ot.

Mé zami, si lété posib mète inn koté d’lot-an paralèl, sak lo diskourèr i di, é sak lo moun lé sansé ékouté i antann, épi sak li di par li mèm, nou noré vi-d’apré sak mi pans in sakré diférans. Sa lé vré kan ou i akout in diskour, sa lé vré galman kan ou i lir inn-dé paz. Sanm pou moin, ni romarkré lo kozman intèrèr sak lé la pou ékouté i polyé drolman sak lo diskourèr i di épi vèrsi-vèrsa.

Dann zistoir kréol lo rakontèr, tazantan, li arète in kou, épi li di : « Kriké ! Kraké ! » tèl fason li artrap lo latansyon bann zékoutèr ki komans pi zékouté...kan son majinasyon i akrosh bann niyaz an pasan, kan zot problèm pèrsonèl i rant dann lo zistoir lo rakontèr l’apré rakonté é kan zot vi pèrsonèl, zot zannuiman, lo dèrnyé lépizod zot traka sansa in l’ansien i polyé-in pé i di li parazite-lo zistoir lo rakontèr l’apré rakonté.

L’èrla, mi parl zistoir mé alon sèye kalkil sak i éspas kan in diskourèr i diskour,é kan son diskour in pé long-long solon lo moun l’apré ékouté sansa fé konmsi. San mantir i fo li nyabou, pa toultan mé tazantan, lans in zagraf pou tienbo l’atansyon .Mé zami, zot la déza kalkilé pou kosa zot i arvien dsi sak in moun la di é zot i arvien pa dsi sak in n’ot la anparl dann son kozman.Kalkil azot bien ! Sirman sé in késtonn konténi ! Sirman sé in késtyonn form ! Sirman sé n ‘afèr d’sharm pèrsonèl nip é apèl l’ora.Mé galman in késtyonn zagraf lansé tazantan pou sèye tienbo limazinasyon i domann arienk pou shape.

Mi di pa sa pou anpèsh bann diskourèr diskouré, ni pou anpèsh bann zékoutèr ékouté,mé pou dir azot sa lé pa osi fasil konm in kréyon pou tienbo déyèr l’orèye.

Justin