Zot konba an tou tan dopi zot déportassion… I paré i fo pa di lo mo-la mé pou nou konm pou bann sèr é frèr shagossien in sha sé in sha é pa in lapin. In déportassion sé in déportassion in poin sé tou… Solman la pa toulmoune la pèrde dann sète istoir é bann zanglé, lo méyèr partizan lo monde lib la zamé été pèrdan la dan.

Pou komanssé l’avé in biznèss fizé polaris. Bann zanglé l’avé bézoin sa pou ékipe zot soumarin nikléèr é konm zot l’avé poin la téknolozi pou fabrike sa, zot la domann Zétazini pou fèr azot in pri pou ashté lo bann fizé. Sé konmsa ké zot la fé zékonomi la dsi. Toute fasson, dann tan-la bann grann puissans té i rogarde inn é lote konm i rogarde do lé dsi l’fé é sa téi déranz pa zot fé la mizèr bann pèp.

Mé la pa pou sa zot téi pèrde lo sanss bizness. I paré é sa la di dann télé Zétazini la loué la baz Diégo-Garcia pou troi san vin million dolar avèk bann Zétazini é mazine in pé sa la komanss dann bann zané soissante-dis ziska koméla : zot i oi koman GB la fé son bèr dsi la tète Shagoss é biensir sa la pa pou bann prinssip moral mé par amour pou larzan, in poin sé tou.

Arzoute avèk sa lo tourism ; sis mil éro par voyazèr pou vnir dan la mèr Shagoss sof si sé bann shagossien pars zot lété persona non grata. Kalkil ankor larzan zot téi fé dsi bann tinbe ziska ké linstanss internassional i kass zot né i done azot in kou d’rèss trankil. San konté finalman ladrèss mail pars la dsi ossi téi fé larzan.

Pandan stan-la téi done in myète tazantan pou gouvèrnman Maurice é pou bann shagossien san obliye fé sign in papyé bann shagossien la signé é téi kondane azot momandoné pèrde zot prossé vi ké zot téi promète pa pouss bann zanglé an prossé par raporte losoidizan dédomajman zot l’avé gagné.

Mé zami lé vré lo tan i sava shanjé bann shagossien i komanss oir klèr firamézir mé lé kant mèm itil konète kossa i mète déssèrtin an mouvan-sèrtin k’i mète an avan la défanss la liberté mé i krash pa non pli dsi larzan, finalman lo sèl valèr ké zot i koné.

A bon antandèr salu !

Justin