Matante zélida la ékrir Justin :
Mon shèr nové, mon spès salté... Akoz zot i èm koz déssi zafèr i intérès pa la plipar d’moun ? Zot l’apré di solman : Tèl shantié i sava fini : la kout tann milion leuro. Tèl shantié lé an kour : va kout tann milion leuro. Tèl shantié i sava komansé : va kout tan. Tèl shantié i rèv pa d’komansé : va koute... étsétéra-étsétéra la ké lo ra. Bin, nout ti problèm i kont pa don ? Sansa i kont pou la po patate ? Touléka, si sé pou zot fé zot propagone, la pa in bougrèss konm moin va tonm dann pano !

Justin la fé aèl pou répons :
Mon vié matante, la pa in késtionn propagone. Sa in késtionn ékip lo péi biensir, épi donn kréol travay. I pé pa di bann jèn alé aprann in bon métié pou alé asiz kan lo zétid lé fini ! Si demoun la sakrifié zot tan pou gingn in bon formasion, apré i fo zot i gingn in bon travay... é a-titré, pa pou dé zour... Azout èk sa, kan in bonpé milié d’moun i trouv travay dann bann gran projé... in bonpé milié d’ot moun i travay tou-otour, dann réstoran li ! pou fé lanimasion li ! travay dann komèrs li !
Gran projé ? Pour sir, sa nou la bézoin ! Sa in manièr pou tir d’moun dan la mizèr. Fransh vérité !

Justin