In moun i koné lo tik-tak la politik bann péi rish i pouré ésplik amoin in n’afèr ? Sak mi vé savoir sé pou kossa sak lé pli inportan, sé anons in n’afèr, épi si i gingn pa fé, kass pa la tète ! Kissa i pé ésplik amoin sa ?

In légzanp ? Ala li la : bann péi rish la fé in gran rénion lané 2005, zot la di zot i sava ède bann péi l’Afrik. Konm zot i koné arienk’in n’afèr, sé larzan, zot la di i sava donn in paké larzan bann péi-la. Na inn-dé somèn, Yannik Noah, avèk inn-dé dalon, la parti l’Elysée, akoz zot lavé antandi dir téi mank vinn-sink milion l’euro. Astèr, i di la pa solman 25 mé karant milion i mank. Konm di lo kozman : « Zot la rès min dann posh konm Roland Garros déssi plas Barachois ! ». Sa i anpèsh pa bann péi rish bate déssi léstoma.

Zordi, zot i sort anons in paké million larzan pou bann péi l’Afrik. Mé bann l’Afrik lé fine fatigué antann bann prométèr, épi zot i pans, ankor in kou, banna i tienbo’ar’pa z’ot promès. Soman i fé arien : la politik sé anonsé, sar touzour tan trouv in lésplikasion dann dé-troi z’ané. Sar touzour tan dir pou kossa la pa gingn fé, sansa konm kok moulèr, dann in batay, mète la tète sou la zèl.

Christiane Taubira - zot i koné madam-la ? - i di, i fo éfas la dète bann péi pov. A ! Sète-la i gingn pa promète, akoz i gingn pa manti la-d’si. Alor, i rèss konm martin, ki kouzi, i trouv pa arien pou di, i lès lo rapor Taubira dor dann tiroir... Lé ga ! Gran prométèr, gran prométèr minm !

 Justin