Néna in vyé politissien téi apèl Edgard Faure téi di konmsa : « Promèss ? Sa i angaz arienk sak i kroi. Pa sak i fé »… Mézami, zot i koné lo tan promèss l’ariv ankore é si sa i difiz tou koté, la pa pou sa ké nou doi kroire zot toute zordi pliss ké nou la kroir azot yèr épi avan yèr. Romarke koméla bann kandida lé plu instruyé k’avan, parèye pou lo bande zéléktèr é sak lé pa tro instruiyé, lé souvan vèrssé dan la politik. Donk si wi fé promèss, i fo wi asplike koman ou va nyabou réspèkté.

Sirtou néna in késtyon i fo wi réponde par avanss : wi vé fé tèl shoz si ou lé élu, lé bon ! Mé avèk kèl moiyin wi konte fé sa. An pliskéssa i fo wi oi si la réjyonalizassion si i done aou lo moiyin ziridik pou fé. Aprésa ankor wi oi, dan lo ka wi doi afronte bande loby post-kolonyal koman ou va fé… Kan in pé i di avèk la réjyonalizassion wi pé fé in pé sak wi éstime lé néssésèr pou La rényon si ou la promète sa dann out kanpagn, mi panss zot i rève évéyé, sansa zot i koné pa bien lo zènmi, pars néna zènmi la-dan. E zot néna bonpé pouvoir.

Mwin lé sir é sèrtin k’in pé i doi dire dann zot forintèryèr si i fé pa késhoz, sé pars néna poin la volonté, ni la kapassité, é sirtou la tète lé okipé par lo gou pou ramass larzan épi amenn la bèl vi. In n’afèr konmsa lé vré, mé néna poin arienk sa konm lanspèk : lanspèke noute éstatu ki pèrmète anou fé dé shoz mé pa toute sak i fodré, épi néna lanspèk nout sossyété post kolonyal i travaye dann nout do konte La Rényon épi lo pèpe rényoné.

Pou sak i promète in pé tro, mwin néna in provèrbe éspéssyal pou zot li di konmsa : « Gran prométèr, pti donèr ! ». A bon antandère…