Zot i koné fab La fontaine, i anparl in gran pyé d’boi,* la rant an diskisyon avèk in zèrb Sin-Pol. Gran pyé d’boi lé vantar, i pans la poin arien lé kapab fé ali in n’afèr, tan k’a lo zèrb sin-pol lo pli pti briz i koush ali atèr. Ala ké toudinkou in for kou d’van l’arivé, li la pa fé arien lo zèrb sin-pol mé li la kapote atèr gran pyé d’boi. Kosa sa i vé dir par l’fète dann sans figiré ? Sa i vé dir oplis ou lé inportan, oplis ou sé in gran pèrsonaz, oplis la télé, radyo, zournal i atak aou, é oplis bann mové lang i bate tanbour dann radyo pèrkal. Kan ou lé pti i atak aou osi, mé i larg out l’ourlé san tro insisté pars sa i intérès pa bonpé d’moun mé kan ou sé in gran pèrsonaz i kol dsi ou konm karapat dsi tét bèf é i larg pi ou. Alé ! Mi lès azot kass z’ot tète dsi kozman-la é ni artrouv pli d’van sipétadyé !