Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Gran shèf lédikasyon nasyonal :
Li fé pa la politikik,li may pa sanm sa !

vandrodi 21 out 2009, sanm Justin

La rantré l’arivé. Lo lou i sorte dann boi. Lo réktèr i vyin ésplik anou, konm de koi, toute i roul ron. L’édikasyon nasyonal nana bann z’amontrèr an sifizans. Mèm an tro. Byin ! Pliské byin ! Dé san karant mil marmay la trouv z’ot plas dann in lékol : matèrnèl li, primèr-li, kisoi p’ti lékol, kisoi moiyin lékol, kisoi, gran lékol. Myé k’sa… I tard pa, La Rényon i sar artrap son rotar déssi La Frans pou sak i konsèrn lo poursantaz z’élèv lé réssi légzamin. Byin ! Pliské Byin ! Donkalor, lo boug sé in réktèr éré, vi k’li la byin amène son promyé rantré,li la byin amène son bato konm k’i fo.
Ala, k’in pé, in bann zamé kontan, in bann rodèr d’boute, in bann i shèrsh lo pou dan la tète na poin shové i trouv moiyin dir, lé pa si bèl ké sa, lé pa si byin ké sa, lé pa roz partou, pou toulmoun, dan toute lékol. Lo réktèr, son gaz i monte : kossa so bann san konprann nana pou may azot dann son l’édikasyon nasyonal. Akoz so bann i koné pa aryin i prétan donn in l’opinyon valab la-dsi ? Bann tète vide, va ! Bann z’ignoran,va ! Mi domann amoin si so bann moun i koné mèm konté. La pa sir !
Zistoman, bann tète vide-la i domann pou kossa, an parmi bann z’amontrèr i sort la-ba déor, nana soisann-dis la poinn post, lé san-aféktasyon. Lo réktèr, bandé an trann-sis i di azot : mé toultan lé konmsa ! Poufèr zot i fé l’étoné ? Poufèr zot i fé z’ot gro-kèr. Mé ala pa k’so bann moins-ké-aryin, i prétan dir bann demoun la pass z’ot diplome La Rényon, lédikasyon nasyonal la fé valding azot dann bann gafourn la métropol ? Akoz, bann moun la gingn z’ot diplome issi, in pé la poin post, ni d’issi, ni d’la-ba ?
La, lo réktèr bandé an soisann-douz -dé foi trann sis !- la di : antansyon ! Pou son par, li okip L’édikasyon nasyonal, li sé lo gran shèf la-dan. Li fé pa la politik. Li may pa sanm sa !

Justin

l’ésplikasyon inn-dé pti mo :

An sifizans : la kantité k’i fo ;
Gafourn : in landroi pèrdi.
Son gaz i monte : son kolèr i monte.
Poufèr : pou kossa ! Akoz
San konprann : tète vide, z’ignoran… topète-morète.


Inn modékri, inn ti lavi, inn komantèr ?

signaler contenu


Facebook Twitter Linkedin Google plus