Brassens dan son shanson "Lo tan pasé" i di apopré sak i suiv :

Li lé touzour zoli lo tan pasé,
Inn foi li la fine kas son marmit,
Ni pardone tout sak in pé la fé,
Tout mor sé in bann brav tip.

Sé solon ! Pou koué mi di sa ? Pars moin la lir dann in zournal la droite in modékri dsi in gran z’onm La Rényon. Lo boug sé Gabriel Macé. Moin mèm mi koné in pé dsi li. Parl pa bann pli z’ansien, mi pans zot na z’afèr pou di. Moin la antann son nom dann in diskour profésèr Henri Lapierre. Té apré parl Macé, dan la kour Lucas épi son pasé dann tan li lété pou Pétain, é kosa lo profésèr té i di : koman sa la éspasé ? Koman sa la tèrminé ? Par in sèrtin nonm kou d’pyé dann in sèrtin déyèr té i kour dan la ri d’Pari. In l’onèr pou in gran z’onm !

Sak moin la viv par moin mèm, sansa moin lété pa loin, sé déga son bann nèrvis romé a-blok, in pé armé siouplé, la fé dan la kanpagn z’éléksyon 1959. Sak moin la viv, sansa moin té pa tro loin, sé lo matrakaz Paul Vergès lésé pou mor dovan l’otèl de vil, la bal pistolé la travèrs la poitrine Eliard Laude, in jenn disèt-an épi in n’ot jenn té bien blésé... Dann zournal-la i di, Macé la gingn larzman son z’éléksyon ? Pli larzman i pé pa ! Kan té fine bour l’irn san pour san Boi-Dnèf Sin-Dni, san pour san La Bretagne, konm l’avé poin asé voi, dann fon la Rivière, lo troi-san-sinkant-troi voi Paul Vergès la vni 23. Pli larzman i pé pa !*

Sof mon réspé pou sak la ékri dann zournal. Sof mon réspé pou lo zournal li mèm. Mé, pardon siouplé, bann gran z’onm konm sa, La Rényon noré pi s’an pasé.

 Justin