La kriz lékonomi lé pankor déyèr nou. Près in miliar d’moun i soufèr la faim. Plis dé million d’moun la pèrd z’ot kaz la-ba dann l’Amérik. Nana in péi i apèl l’Island lé kaziman an fayite. In kantité rotrété i tranm zour konm nuit pou z’ot rotrète, akoz zot la pèr in pé la fine zoué la bours ansanm é pétète la fine pèrd... étsétéra étsétéra la ké lo ra !
Mon kouzin, nana pli grav ké sa ! Avans in pé zorèy ! Sak mi sar di, i fo pa marmay i antan... Mi di, mi di pa ? Alé, mi di. Mor pou mor ! Méssié Strausskann, in gran vaza sosialis, prézidan lo FMI la tonm dann pièz. Parl fèt, son gro larzan i rann ali zoli, i rann ali plézab. Alor in zakavouèl i sort la Hongrie, la fé z’apèl. La fé trrout, konm tortrèl... Lo boug la tonm dann pano. Éstèr, banna la rouv in lankète. Ma fiy ! La lé grav la !
Mé nana pli grav ankor ! Na in mal fondé la éspione lo kont lo prézidan épi avèk in fo kart i tir tazantan in moné déssi : dé san ero ! Oté ! Boug-la la romarké, poitan li doi z’an avoir lo pourkoi... Alors, dé san éro an plis, dé san éro an moins... Kossa i fé pou li ? Zot i kroi pa ? Touléka, mèm in problèm gro konm in tèt zéping, li fé in ka ansanm. Grav, grav, plizanpli grav !

Justin