Médame, zé Méssyé, la sossyété, koze èk mwin sé koze èk in kouyon, mé sé o pyé d’lo mir k’i wa lo masson.

Mézami, zot i koné grélé – dann fab Louis Héry téi di guèrlé – mwin lé sir, souvan dé foi i antann ali apré shante kissoi dann in trou d’rosh, kissoi dann in trou d’boi. Wi pé kroir, vi k’i antann ali dopi asé loinké li lé pli gro k’sa… in ptiii bébète insignifyan.

Antansyon, alon pa konfonde ali avèk sigal pars sigal i kriy pli for k’li. I fo pa non pli konfonde ali avèk griyon pars sète-la osi i kriy for. Mé grélé sé grélé é an rézon d’son grossèr, mi trouv li fé antande ali sifizaman.

Sak i vé dir pou fé antande aou la pa bézwin ou lé gro, in bon lorgane épi in lopignon sa i siffi. Mèm pti, wi pé fé antande aou é sé sak lo kozman i vé dire anou. Alé ! Mi kite azot rofléshi la dsi é ni artrouv pli d’van. Sipétadyé.