Zéléksion la fini : lo mèr épi konsèy zénéral. Pou lo mèr, lé fasil : sak lé an o dési la tète biltin sar lo mèr, sof si in pé i pass kal, mé mi kroi pa pou so kou issi. Kissa i pran la tète konsèy zénéral ? Sète-la lé pli dir pou konète, vik na poin pèsrsone i komann inn-a-l’ot la-dan : na poin lo shèf.

Dann in nafèr konmsa, koman i fo fèr ? In moun ordinèr, mèm si li la pa fé lékol politéknik, va di, pétète, i fo oir lo program, kissa lé dakor avèk kossa. Sa in gran zafèr, in konsèy zénéral-la... Sa nana bonpé résponsabilité, sa nana in bèl papa bidzé épi problèm baba ! Pou an avoir lo larzan k’i fo. Sirtou dépi k’gouvèrnman i pass son tan pou raz la pinte.

Na in pé la di : « Antansion, lo konséyé zénéral la pa ladzoin lo mèr ! ». Pèrsone la pa vouli ékoute azot. Astèr, bien annuiyé vik shakinn téi pans arienk son komine. Alor, i di lo konsèy zénéral i doi fé in politik pou bann komine, mé sa sé zis in pti poin pars i fo mazine tout sak la loi i di déssi son bann pouvoir.
Késtion program, i anparl pa tro, mé kissa sar prézidan, sa in n’afèr i kont sa : radio li, télé li, zournal li, i bate la lang arienk la-dsi. Sétaki i san son kor, inn la pèr, l’ot i krin... Oté ! Kossa l’arivé don ? I arvien lo tan bann grénouy té i domann in roi, sansa in rène ? La pa vré ?

Justin