Mézami, mi panss mwin la fine anparl azot kozman-la, mé konm sa i pass ankor in kou dann mon tète, mi désside roparl azot sa ankor in kou. Sirman pou rodi la mèm shoz, pars mwin la romarké mon tète i fonkssione konmsa : kan li la fine fiks in n’afèr dsi lo diks dir son mémoir, sa lé la é i éfass pa — li roprodui a l’idantik.

Alé ! Astèr alon rovir dsu noute kozman. Vré pa vré ? Vré dann sanss i fo pa sote dsi lo promyé l’okazion. Lé pa forssé sé lo méyèr é an aspèran in pé lé possib in méyèr l’okazion i prézante é wi rogrète in pé oute manke passianss… Pa vré si ou lé inpridan é k’wi lèss oute shanss passé.

Alor, si mi di azot, pétète oui, pétète non, zot lé riskab panss mwin sé in sharjèr d’lo. Domaz pars mi sèye pa ète, mèm si mon kozman lé an niyanss. Mi kite azot rofléshi la dsi é ni artrouv pli d’van, sipétadyé.

Justin