Mézami, zordi mi panss provèrb-la. Mwin lé siréssèrtin mwin la fine an parlé, sansa d’ote ké mwin la fine ansèrv sa dann zot kozman mé vi k’mi mazine ali, i fo mi éshanj in pé avèk zot.

Pou kossa ?

Pars li lé vré é li lé pa vré an mèm tan. Vré pars si wi koné atann momandoné ou va gingn in bon l’okazion kissoi pou fèr in biznèss, kissoi pou la shanss piss in pé dsi oute pyé… I di pa ossi « la passyans i guéri la gal ». Alor zot i oi lé pa pli mové prann son tan ké kour dsi dé k’i prézante.

Mé antanssion mi souvien in fab La Fontaine — kopyé dsi bann fabilist dann tan lontan — i anparl in zoizo, lo éron, l’apré bate karé é pa préssé ditou pou ranpli son zabo, ziskatan ké li fini par kontante ali avèk in limasson. La pa granshoz pou in bèl zoizo, assiréman !
Mi sorte dir kékshoz épi son kontrèr : sé sak lé gayar avèk bande provèrb. Konm i di, li pézète vré konm pa, é mwin mi domande azot rofléshi la dsi é ni artrouv pli d’van, sipétadyé.

Justin