Mésyé, Médam, La Sosyété koz èk moin sé koz èk in kouyon mé sé o pyé d’lo mir k’i oi lo bon mason. Mé zami moin lé sir konm moin zot la fini fé lo konstatasyon : ou i ashté in gro paké brède é ka n lé paré pou manzé ou i apèrsoi i rèss aou trépé. Lé vré, ou la fine tir bann koton, bann fèye dir é lo brède triyé i ramas dann fon out marmite. An fète sa i vé dir lo rézilta lé pa o bout léfor ou la fé. Konbien foi demoun i fé in bonpé léfor é o final i gingn trépé. Na poin lontan moin la ramass kafé, lo bann grin rouz : l’avé pa mal. Moin la tir lo pilp i vien dsi, lo ta la diminyé. Apré moin la mète a sésé é kan té sèk moin la kass lo kokiye lo ta la diminyé ankor. Astèr-la i fo mi griye ali, mi moul ali, mi fé koul ali ébin konbien tass kafémi gingn ? Pa in ta biensir. An touléka mi kite aot rofléshi la dsi é ni artrouv pli d’van. Sipétadyé.