Mésyé, Médam, La Sosyété, koz èk moin sé koz èk in kouyon-mé sé o pyé d’lo mir k’i oi lo mason. Pé sfèr in pé rant zot i koné ankor grolé, pé sfèr d’ot i koné pa : figir azot la plipar d’tan li kriy mé i oi pa li ousa i lé, défoi mèm li lé pa la é sé out zorèye k’i fé sak i apèl zakoufène, mé kan ou la nyabou poz la min dsi li, li bouj pi, li fé pi dézord ziska k’li mète a kriyé é konm i di pli o : kan li kriy i antann ali. Mé par l’fète moin l’apré anparl in provèrb moin la é in provèrb konm mi di souvan dé foi sa néna in sans an déor d’grolé li mèm, an déor d’son kriyé épi la min k’i kapaye ali. Mi pans sé pou di sinploman la pa pars ou lé pti ké ou i pé fé pa antann aou pou out droi. La plipar d’tan mèm pti ou i pé fé antann aou, é dé foi pli myé k’lo gro pars kan ou i kriy, ou i kriy po vréman. Alé ! Mi kite azot roflshi la dsi é ni artrouv pli d’van. Sipétadyé !