Médam, zé méssyé, la sossyété koz èk mwin sé koz èk in kouyon mé sé o pyé d’lo mir k’i oi lo masson.

Mézami, mi pans zot i koné kozman-la pars mwin mèm mi koné ali dopi étan pti, dopi mwin la garde mé konénssans… Konm zot i koné néna in tan noute mémoir i ramass lé shoz vagman, é néna in tan li ramass lé shoz klèrman é son tan-la sé lo tan lé konéssans é sa lé pou la vi, zot i konpran.

Donk si ni arvir dsi noute kozman é si ni vé konète kossa guèpe, li vé dir, antouléka sak nou lé zimin ni fé di bande guèpe, mi pans lé sinp é la pa bézoin bak +24 pou konprande ali. Sinploman pou di : fé pa dir amwin sak mi di pa, domande pa mwin sak mi pé pa done aou.

Lé vré guèpe i fé zoli ni, avèk gayar zalvéol. Lé vré li ponde dozèf é li fé grandi son pti, mé la pa li pou done domyèl, mèm pa in dégou, mèm pa an rèv. Alor noute toute lé konmsa, dann in sèrtin sanss, nou néna noute kapassité é sak lé pa dann karo noute kapassité. Alor ?

Alor mi kite azot rofléshi la dsi é ni artrouv pli d’van. Sipétadyé.