Finalman mi panss lé vré, mém mi panss sak lé pa militèr la pa bon pou amenn la guèr. La prèv ? Partou néna la guèr, é partou i tyé d’ moune san konte konbien, san konte koman sa lé mor, antouléka la pwin z’afèr pou plère amwin la-dan.

Mé néna guèr épi guèr ! La guèr pou libèr d’moune épi la guèr pou ésklaviz le moune, donk pou domine azot. Inn é l’ote la pa parèye mèm si lo rézilta sé d’tyé d’moune, épi provok lo malèr in pé partou.

Si ni rogarde la karte lo mond koméla, si nou néna in laplikatif pou marke partou néna la guèr ébin, sirésèrtin landroi pou fé la guèr si i manke pa dann toute kontinan, in pé dann toute gran konm pti landroi. Mi rapèl kan mwin téi fé zétide, l’été lo tan la guèr vietnam : bann vietnamieun téi fé la guèr bann zamérikin épi zot konpliss é mwin téi suiv dsi zoinal lo déplasman bann fors libérassion par rapor bann fors réakssyonèr, épi bann fors dominassion.

Sak foi bann fors libérassion téi ranporte in viktoir mwin lété kontan, é shak foi bann fors libérassion i pèrde in bataye mwin té trisie. Poitan in mor sé in mor, in andikap sé in andikap é demoune blèssé sé demoune blèssé… Mwin l’av é kamarade téi di mwin téi trouv mon jouissanss dann bann takon viktime. Té pa vré biensir é kan mwin téi sava fé manifèstassion lété pou la pé, mé la pé just é pa pou la pé bann zopréssèr.

Zordi la pi parèye mé néna touzour bann guèr sak lé just épi sak lé injust, Bann guèr d’libérassion épi bann guèr d’dominassion. Mi panss lo monde va kontinyé konmsa, mé la pa pou sa m’a di toute lé parèye, pars final de konte toute lé pa parèye.

A bon antandèr, salu !

Justin