Arzoute avèk sa la plipar d’moune i konpar azot avèk bann gran z’ansien, droite, konm gosh, avèk lo santre é la konklizyon sé ké zot lé pa d’nivo bann zanssien : zot i gingn pa prévoir pars gouvèrné sé prévoir, zot i gingn pa déssidé, zot lé tro parèss pou prann kan i fo bann déssizyon lé nésséssèr pou in méyèr avnir pou nou rényoné. Arzoute avèk sa zot i kalkil arienk ranpli zot posh.

Lé bien rar lo bann zoditèr i kritik l’éta lokal épi son shèf, lo préfé. Lé bien rar zot i kritik lo bann gran sèrviss i dépann la plipar d’tan l’éta mèm si banna i konsidèr ké zot na pwin arien a voir avèk bann zélu. Pars bann zélu i fé la politik, épi la politik lé sal konm noute toute i koné. Mi trouv sa plito normal pars lo partaz é la roganizassion bann pouvoir épi bann résponsabilité lé si tèlman konpliké, lé si tèlman mal éspliké ké lo promyé élu… kréol rényoné do préféranss i pass sou la min, sé li mèm lé konsidéré konm lo résponsab sak i ariv é lé pa si bon ké sa.

Alé dir azot si wi vé kan dann l’ané 1981 kan lo pouvoir santral la domann lo parti d’aksèpt la déssantralizasion é li va oir koman lé shoz va bien marshé — noute parti l’avé in gran doute avèk rézon pars zordi pliss karantan apré ni oi lo zoutiye lé pa sak i fo kissoi pou shanj le lozissyè pou nou trape in vré nivo d’dévlopman. Zordi ni apèrssoi lo zoutiye lé pa sak i fodré anou mé sa i anpèsh pa lo bann zoditèr bann radio tape dsi bann zélu é promète azot fèr manj azot patate avèk la po kan zélékssion v’arivé.

Kèl lésson ni pé tir d’sa ? Mi panss i fo sirtou travayé.I fo sirtou éspliké pou kossa i fo shanj lé shoz é mi panss sèryèzman, ti pa pti pa n’arivé.

A bon antandèr salu !

Justin