I pé pa dir sa la pa fé dézord. I pé pa dir la pa bat tanbour dsi in n’afèr konmsa. Kèl z’afèr ? Lo kongré bann mèr. Sa la éspas la-ba dann Paris, é pa moin dé san diz-uit délégué pou roprézant La Rényon. I paré, si shak komine nana dan la Frans l’avé lo mèm dégré d’délégasyon, noré plis troi san mil pèrsone dann kongré-la. Biensir, nora été in kongré inposib pou fé.

L’èr-la, nou na késtyon pou pozé. Dabor, kisa la pèy so bann séjour épi lo bann voiyaz ? Pars partou lé pa parèy. Dan désèrtin komine, lo voiyaz lété tou-fré-péyé. Dan d’ot, la komine la réklam bann délégué in partisipasyon. Lé domaz bann komine la pa bat tanbour dsi la fason zot la fé, pars zot i koné, Kréol, dé foi, nana gro l’éspri, é in pé i mazine, an parmi bann délégué, tout la bann lé profitèr san pour san.

In dézyèm késtyon i baz dsi koman la prépar lo voiyaz. Vi k’sa i rant dann travay, koman banna la prépar zot travay é kèl bon rézilta zot la nyabou an avoir ? Pars si na bon rézilta, i fo pa obli dir bann Rényoné. Moin pèrsonèl, mi pans in voiyaz travay, sa in bon l’okazyon pou an avoir bann kontak itil, pou fé avans in pé dosyé, é pétèt osi pou alé oir kosa bann mèr i fé la-ba dan zot komine, ou pas in bon tan pou diskit èk bann mèr l’Outre-mèr.

Pou kosa mi di sa ? Pars mi koné désèrtin z’élu i travay konm bèf ; mi koné osi désèrtin i pans lo ropo èk la bone nouritir i tyé pa son om. Sé pou sa moin noré bien proféré bann moun la voiyajé i ésplik konbien l’arzan zot la tir dann zot posh, konbien zot komine la péyé, si zot la fé par-la in l’invéstisman profitab pou la koléktivité avan, konm di La Fontaine, kriy avèk lé z’ot : « Haro dsi lo bourik ! ».*

 Justin 

*Dann lo fab "Les animaux malades de la peste" trouv pti bout fraz-la : « A ces mots, on cria, Haro sur le baudet ! » é la moral dsi la finisyon i pé pran sa konm in krétik l’inzistis dan la zistis... Suivan ké ou lé for sansa mizèr, zizman la kour va pinn aou an blan ou sinonsa an noir.