Alor zot i konpran bien lo prinssipal sousi in plantèr lété pa d’done mayi son shien pars lété riskab téi détrui manzé son mète épi son famiye.

Parèye, téi di, i amont pa lo shat manz la grèss pars fitintan téi fé kui manzé avèk la grèss pars pou kui manzé a luil téi falé ou l’avé in bon moné é lété pa lo ka in bonpé dmoune issi shé nou.

Astèr kossa bann provèrb-la i vé dir ? Mi panss i vé dir antanssion fé détruir a ou par kélk’in san défann vréman out lintéré. Lo patoi i invite anou sirtou défann npute lintéré.

Pou kossa i pass par zanimo ? Lépa rar kozman i mète an sène bann zanimo é sa i date pa d’yèr. Ni pé apèl sa in kozman par parabol é zot i koné, nou kréol ni apréssyé lo parabol é i fo dir nou lé parabolèr é pa arienk dopi inn-dé zour ;
Alé ! mi kite azot rofléshir la dsi é ni retrouv pli dvan, sipétadyé.

Justin