Sépa si zot i koné shanté Mishèl Admette té i di konmsa : « Mi nouri pa lo vèr pou pik mon kèr ! »-mi sote éksepré in bout lo kozman i di konmsa : “zanfan la pa moin, mi done pa manzé ! » pars konm zot I pé rann azot kont par zot mèm la pa zoli-zoli konm santiman. Santiman lo pti pèr I priv manzé sansa sak lé pli nésésèr dan la vi zanfan son madam. Santiman lo pti mèr i okip bien son prop zanfan mé pa sète son mari. Di pa moin sa i égzis pa pars moin la koni dann mon vi dé ka é dé ka. Moin la koni galman désèrtin moun téi okip bien zanfan té pa zot pars zot la sinploman ramasé. Final de kont si néna bon l’égzanp néna galman mové l’égzanp mé la vi lé konmsa. Alé ! Mi lèss azot roflé shi la dsi é ni artrouv pli d’van sipétadyé !