Médam, zé Méssyé, la sosyété, koze èk mwin sé koze èk in kouyon, mé sé o pyé d’lo mir k’I oi lo masson. Mézami kozman mwin la mark an-o la, mi panss zot toute I koné. Défoi I di ossi : I amontr pa lo shien manz la grèss. Antouléka, mi panss I fo évite amontr in marmaye fé in n’afèr I pé annuir aou domin. Sé konmsa ké lé bien konète in bon n’afèr pou ansèrv aou, mé si wi sava aprann kékshoz spésyalman pou an-nuiye lé zot, la pa in n’afèr rézonab. Mé a bien kalkilé, wi pé konète in bonpé zafèr, mé sirtou konète ansèrv out konéssans pou lo bien é pa pou lo mal. In légzanp : si wi obliye out klé loto dann loto fèrmé, I pé z’ète itil konète koman alé rode ali donk konète rouv la porte loto : sa sé in n’afèr I ansèrv aou. Mé alé rouv la porte loto in moun pou shipe in n’afèr dodan ébin sa lé pa in n’afèr a fèr. Donk la pa lo savoir ké lé danzéré mé plito d’ansèrv ali bien konm k’i fo, solon in bon prinsip.. Alé ! Mi kite azot rofléshi la dsi é ni artrouv pli d’van. Sipétadyé.