Médam zé méssyé, la sossyété, koz èk mwin sé koz èk in kouyon, mé sé o pyé d’lo mir k’i oi lo masson.

Mézami fransh vérité, mi panss néna dé shoz i fo pa amontré :dabor néna sak wi pé aprann toussèl san rode midi a katorz èr. Aprésa néna sak lé kont-natir é sa lé pa itil amontré, é ni pé dir lé mèm danzéré.

Sé konmsa ké mi sorte rapèl in provèrb é provèrb-la sé sète mwin la mark an-o la. Pèrsone noré l’idé d’amontr in poisson grinpe dsi pyé d’boi. Poitan noute toute i pé rapèl noute skolarité é toute sak lo mètr la sèye fé rante dann noute tète ké lété konplèteman initil pou nou.

Kan mi di sa, sak i vien dann mon tète toutsuite sé « the radiator ». Mwin l’aprande sa kan mwin lété dann klass sizyèm é lo proféssèr, san ésplike anou kossa sa i ansèrv, la fé aprande anou sa bèteman konm d’ote mo ankor é kroi amwin si zot i vé, mwin la zamé gingn aprande sa é mèm mi panss sé zot fote si mwin la pa gingn aprande l’anglé pars l’avé touzour in radiator rante li épi mwin.

Alé ! mi konsèye bande gran pédagog bien rofléshi dsu sak mi done azot pou konprande pars fransh vérité néna ladan konm dann d’ote shoz la klé d’léshèk. Mon l’éshèk biensir, mé galman sète bonpé amontrèr. Ni artrouv pli d’van, sipétadyé.