Matant Zélida la ékrir Justin :

Mon shèr nové, rouj-de-fon dovan l’éternité, M’a dira ou in n’afèr : promyé foi mi antann prézidan Holland mète dir bann téroris konmsa. Li la di azot astèr i marsh ar pi konm avan. Si zot i kroi l’éta va s’anpas dési, zot i mète zot doi dann zot zyé. Pars kou isi, i sa oir kèl oté brinjèl i sharj ; Mé konm di lo kont, i f opa solman lé shoz i spas an parol, i f k’i spas osi dan l’aksyon ; Sansa sar kozman la boush rouvèr ! tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, i étone pa moin antann bann parol konmsa dann out boush kisoi sou out plime. Pars d’apré ou gouvèrnman La Frans la pa résponsab sak i ariv. Kisoi gouvèrnman la gosh, kisoi gouvèrnman la droit. Parl pi gouvèrnman l’amérik ! Pars li mèm an promyé la amar lo dyab avèk son karyol é gouvèrnman fransé la fé parèy/ zot la ankouraz bébète pou tyé lo dyab. L’èr-la bébète konm lo dyab iardévir dsi zot. Pandan s’tan la bann sitoiyin normal, bann ti kolon, sé zpot k’i ramas bann po kasé. Tok ! Pran sa pou ou !