Dopi zédi matin in bann radyo, mèm désèrtin télé, san konté bann zournal, l’apré fé lo tour dann la nuite Halloween demoun la fé déga-la fé la vyolans dsi la polis, dsi bann komèrs-mèm bann voitir la gouté kan déssèrtin la bril azot.
I fo antann sa ! I fo antann bann zoinalis, konm bann demoun an parl de sa… Kan ou i ékout banna ou i antann azot parl lo mank réspé par raport bann polisyé, lo mank moiyin néna dann désèrtin komisarya. I anparl galman bann déga dsi bann mobilyé d’vil é tout lo bann konsékans ; si ou i ékout ankor myé, ou va antann désèrtin apré agoniz bann paran noré pa okip z’ot zanfan konm k’i fo.

Alor i mank pa, i domann mète bann paran a l’amand, épi koup bann zalokasyon familyal… Dann kalité sobat-koz konmsa ou I antann l’apré di toultan la mèm shoz. Biensir i rode pa si s é in bon métod sansa si la pa in bon métod. I d’mann pa si sa I pézète moindroman éfikas sansa non. Bann yaka, bann fokon, i rant dan la dans épi sétaki i trouv lo méyèr solisyon solon li. Mé la pli par d’tan lo fisèl la fine près kasé.
Moin pèrsonèl mi di si z’ot solisyon lété éfikas, néna lontan toulmoun i konétré é sré pa nésésèr kass zoit tète pou trouv in bon soisyon.. . Mi vé pa dir moin lé dakor avèk lo bann la fé sak zot la antann dir dann télé, sansa dann zournal. Mé par avans mi pans – konm i di-sé inn kou d’zépé dann lo.

Moin la mèm antann in moun dir i fo pran lo prob lèm a son sours. A ! Moin la pans, ala in moun i koz bien mé kan li té fine bate son lang moin la komans konprann téi sava ranpli bann kasho avèk marmaye, ranpli la posh l’éta avèk bann z’amand épou lo rès diminyé bann z’ède sosyal obliz bann moun pov okip z’ot zanfan é si, é la é ankor inn foi nou lété parti dann mèm diréksyon ké tout sak l’avé koz avan.
La plipar d’tan tout i pans la réprésyon, i obli ziska anparl la prévansyon.