Koméla néna in bonpé kréol i yèm bien zété. Tèl shoz i serv pa zot, zète ali ! Sa in n’afèr tro vyé ! zète ali . Sa lé pi a la mode ! Zète ali. Sé konmsa mi oi d’isi d’laba désèrtin z’afèr lé ankor bien bon mé lé zété dsi in ta la salté. So matin, moin la trouv in ga apré zète in brouète, pars, sanm pou li, lo brouète lé tro vyé. Moin la dmann ali si li pé pa ansèrv in n’ot izaz ké ansèrv ali konm brouète. Li la réponnn amoin, in brouète k’i pé pi z’ète in brouète i doizète zété. In poin sé tou ! Lèrla, moin la di ali demoun dé sèrtène foi i mète la tèr épi i ansèrv pou plant kékshoz dodan : kisoi in pti zépis ! Kisoi in pti légime ! Kisoi d’ot shoz… Li la réponn amoin sèl shoz li ansèrv sé d’zété. Alé ! Mi kite azot rofléshi la dsi é ni artrouv pli d’van. Sipétadyé !