Bann G8 la déside diminié bann gaz i shof tro lo klima : zot i vé diviz sa par dé. Solman, in pé l’asosiasion konm Greenpeace i di : i diminié pa asé, épi lo délé lé tro lon. Pou zot, tout demoun sar fine griyé kan v’ariv lané 2050 !

L’Amérik la pa sign protokol Kyoto, mé so kou issi, èl lé dakor pou la diminision. Èl lé dakor... ou bien près dakor, ... ou bien èl i fé konm si... Akoz, solon èl, i fo bann péi konm la Chine épi l’Inde i done légzanp.... Banna la pa di tout suit sak zot i pans : zot la atann in pé... aprésa zot la réini a sink gran-gran péi : an parmi lavé la Chine, l’Inde, Brésil, Mexique, l’Afrique du Sud. Zot la di bann G8 diminié zot bann gaz k’i shof lo klima par-la 95 pou san, akoz 50 pou san i sifi pa.

Zot la rodé, zot la gagné ! Par l’fète, pou kossa zot la parti ravaz guèp dann son ni. Pou kossa zot la mazine zot nana lo droi alé fé la moral lé z’ot, alé oir dopi tan d’zané zot la pa fé arien pou k’la Tèr i trouv in bon lékilib. Pir ksa ! Kan zot i oi la Tèr lé an danzé d’mor, zot i rode ankor fé lintérèssan. Zot i rokoné mèm pa z’ot tor, épi zot i rod mète l’otèr déssi lé z’ot.

I ansèrv pa arien zoué an volèr konmsa ! Sa i règ pa problèm la Tèr sa !

 Justin