Médam é mésyé, La sosyété koz èk moin sé koz èk in kouyon mé sé o pyé d’lo mir k’i oi lo bon mason. Mé zami, dann tan moin la grandi, zot i koné marmaye lontan lété pa konm marmaye koméla. Kan nou lété dsi shomin shak foi nou téi oi in mang dsi in pyé, nou téi anvoye kou d’galé. Romark kan nou téi oi zoizo té parèye. An touléka tout sort shoz téi intérèss anou… Kan l’avé poin arien nou téi pèrd pa nout tan pou anvoye in kou d’galé. Si nou té fé sa lété par intéré, pars l’avé kékshoz in bi pou no vizé. Astèr nou lé dann in provèrb é in provèrb sa i adapt la sosyété nou lé d’dan é konm mi di azot-san parl solman mang avèk d’ot shoz - ni pé di, Sa i vé dir, i fé pa arien san bi, san an avoir son sant zintéré. San zintéré, épi san bit i fé pa in l’aksyon. Alé ! Mi kite azot rofléshi la dsi é ni artrouv pli d’van. Sipétadyé.