Oté

« I apèl shamo arienk kan néna paké pou porté »

In kozman pou la rout

Justin / 23 novanm 2020

Mézami, yèr té dimansh . Yèr mèm moin la antann dann in pti manzé in moun apré di kozman moin la mark an-o la. Dann kèl ka la pèrsone la di sa ? El la di sa dann lo ka k’in moun i vien oir aou arienk kan li la bézoin out sèrvis- si li la pa bézoin out sèrvis, arvoir Pyèr, tak baro. .Moin la trouv sa doss pou moin, mèm si konm toulmoun mi yèmré i kontak amoin pou d’ot zafèr ké sa. Aprésa, moin la mazine final de kont la vi lé konmsa é la pa bézoin tro kass la tète avèk sa. Si zot i panss sa la pa normal, mi réponn azot si lé konmsa lé konmsa é la pa bézoin mi sava tap mon tète dann in mir, pars l riskab fé mal amoin. Alé ! Mi yèmré zot i rofléshi in pé la dsi é ni artrouv pli d’van. Sipéta dyé


Si an-o laba, péi Bondyé lé konmsa, prépar mon paktaz mi sava.
Mézami, si mi diré azot kèl vizyon moin néna dann mon tète kan mi anparl zardin mon Granmèr Berthe, moin lé sir, zot i diré sé mon majinasyon la rann ali zoli. Poitan mi pans pa lé vré pars mi pé dir azot : « A ! lété in n’afèr vréman sa zardin mon granmèr ! ». Kan mi rogard mon jardin koméla, mi trouv li fé pityé é si in moun i di amoin li lé zoli, dann mon kèr mi réponn : i oi wi koné pa zardin mon granmèr !

Souvan dé foi kan mi sava dsi linternet, mi lir tèl dalon, tèl dalon i domann kosa k’i lé, tèl plantaz, tèl plantaz. Dabitid mi réponn pa mé mi di konmsa, dann mon kèr, l’avé sa dann zardin éstraordinèr mon granmèr. Ousa lété ?Bin dann lalé mang dsi la rout Boi d’ Nèf . In landroi moin la pratik long an larz, larz an long . in zardin mi parkour ankor dann mon rèv, lo zour la nuite, la nuite lo zour, kan mon léspri i dékol avèk mon kor konm k’i diré.

Mézami, si mi di azot prine-ébin l’avé in gran pyé dann zardin-la.Si mi di azot zoranjine ébin l’avé galman.Si i di kakao, si i di mayi, si i di ankor papaye, si i anparl karanbol- i piss dann bol- si i di fig, tomate arbist, si i di mapinm-sorgo, mang tout kalité, mézami l’avé d’zafèr ladan.Flèr ? zot i kroi l’avé pti pé don épi bassin poisson... L’avé galman zafèr konmsa..

Tizane i mank anou ? L’avé, l’avé, l’avé, tizane lé bon pou tout sort éspèss de shoz, dopi la point shové ziska dèrnyé pti doi d’pyé ? I diré té la éksopré pou barr shomin la maladi , pou kal ali, pou poz ali lanspèk, pou dégout ali d’avanssé.

Zardin mon Granmèr, zardin mazik, san mantir, si an-o péi Bondyé lé konmsa, fransh vérité,fé mon paktaz mi sava .