Lo lémission-la i apèl Kalou-pilon, i pass dsi Rényon La promyère, in lémission avèk Jacky Revel, é ni pé dir li zoué dsi vélour an parlan la kuizine rényonèze avèk sak ni apèl a tor bande produi lontan-a tor, pars dann la réalité sé bande produi koméla k’i pé apèl sa. Pars sé koméla ké ni done ali favèr pou vréman é ni pé mazine ofiramézir bande produi-la i sava rotrouv la plass i mérite azot dann noute zassyète. Avèk bande rassine noute toute i koné bien konm sonz, manyok, kanbare é d’ote ankor i plante shé nou é ni pé dire k’i dévlope. Avèk toute kalité bon léguime néna i issi La Rényon, épi noute bande zépiss, san obliye lo kok bataye, noute bande frui. San obliyé ankor bande bon déssèr noute péi.

Antandi in n’afèr intéréssan : kossa i lé ? Friapin ; i pé fé toute avèk sa, é pé s’fère i pé fabrik in farine pou fé d’pain sansa gato, sansa ankor mélanj ali avèk la farine do blé. Pou kossa mi di sa ? Pars issi i fé pa la farine do blé é an pain é an gato i konsome 13 mil tone farine do blé. Si dann so kantité – la téi gingn ansèrv bande rassine-obliye pa lo bon farine i fé avèk la rouroute épi avèk konflore La Rényon-é pétète lo mapinm i apèl sorgho pou diminyé in pé noute linportassion mwin mi oi sa konm in démarsh dann dirékssyon noute lotosifizanss alimantère.

Antandi in kouyonade kant mèm : sé kante i di pou produi bande rassine i fo arash kann. Arash kann ? Alé oir néna rante sète mil épi kinz mil éktar an frishe. Alor, alon travaye frish-la. Antandi in n’ot kouyonade : la pa anparl do ri sansa pou dire la pa bézoin do ri pou ranpli lo bouzaron kréol sirtou ké lo ri i produi pa la Rényon. Inn la pa vré san pour san-i produi koméla – dé lé possib produi do ri issi la Rényon é ankantité konsékante... Ala in n’afèr méssyé Vienne, prézidan la shanm lagrikiltire i doi bien konète é poitan li la pa di in mo la dsi.

An touléka, pou linstan, sak mi rotien, sé ké bande zémission konmsa i pé fé avanss lidé noute lotosifizanss alimantère.