Médam, Mésyé, la sosyété, i fo méfyé souvan dé foi out konfyans pars èl i pé amenn aou a nouri in sèrpan avèk out prop lé-an fransé i di réshof in sèrpan dann son sin ! Konbienn moun zot zasosyé la vol azot, défoi zot prop famiy, défoi ankor in l’anploiyé modèl. Lo pli méyèr volèr sé lo volèr ou i dout pa d’li. Mi rapèl in ga lété kontab dann in l’antropriz, li té i koné tout lo trikmardaz son patron téi fé si tèlman k’in zour li la désid fé in pé pou li é la pa tardé, momandoné lé dé té fine ariv dsu la plime-plis lo patron ké lo kontab mé lo kontab, li osi, li lété pa o nos non pli. Konm i di : « lo tro d’konfyans i tyé la konfyans ! ». Tousa la parti tribinal é laba, la débal lo paké linz sal san pityé. Inn la trète l’ot é l’ot la trète inn mé té tro tar, lété fini avèk z’ot siksé, lété fini avèk z’ot réisite. Alé ! Mi kite azot rofléshi la dsi é ni artrouv pli d’van. Sipétadyé !