Sa in kozman i romont lontan an aryèr. Dann tan tout kréol té i manz mayi, sète zour dsi uit. Mayi té in n’afèr présyé é té i falé pa gaspiyé.

Donk si ou la done out shien lo gou mayi tann é bin ou té fouti pars tanpir k’li la fain, tanpir k’i manj si zépi lé in pé ba, li sot, kap é lo zépi lé parti. Si mayi lé dsi l’argamas a sésé é bin li pass parèy !

Sans figiré, i fo pa aprann in moun in n’afèr i fé d’tor lé la sosyété ou sinonsa lo proshin. In légzanp : fé pète in loto san klé ! Émite la signatir dmoun ! Sansa d’ot shoz ankor, ni sava pa pass an rovi. Kosa zot i anpans ? Arien ditou ? Fé travay z’ot koko ! Fé bouy z’ot matyèr griz ! zot va oir si rant-rant, ni tonm pa kék foi dakor rantre nou !