Oté

« I aprann pa ti shien tète son momon »

In kozman pou la rout

Justin / 11 octob 2018

JPEG - 43.6 ko

Dan la vi néna dé shoz ou i pé aprann, néna dé shoz demoun i pé amontr aou pou fé. Néna dé shoz ou i konète san aprann. Donk néna dé shoz natirèl épi dé shoz kiltirèl : sa lé vré pou d’moun, sa lé vré galman pou zanimo. Pti shien, lo zyé lé pankor rouvèr, kan li santi lodèr dolé, li avans son pti gèl pou tété. Lo shate lé parèye é pti baba galman lé konmsa. Mi souvien, in zour dann in sal d’atant dé madam apré kozé. Oplis zot i koz dousman, oplis demoun i ékout. Momandoné moin la konm konprann inn rant lé dé té apré koz dsi son fiy épi la di dousman dann zorèye son zamiz : « Vi koné intèl i frékant koméla ? » . L’ot la réponn : « Mé kisa l’aprann aèl ? » épi tout la bann-pars l’avé pliyèr pèrsone dann kabiné doktèr - sé d’pète a rir : « Kakakakaka ! ». Alé ! Mi lèss azot rofléshi la dsi é ni artrouv pli d’van. Sipétadyé !