Na poin tro lontan, moin la trouv in kamarad bandé an trantsis. An ké d’bèf, mi di azot. Li l’apré rakonte dovan la boutik, li l’amène inn son zanfan médsin épi li la parti la farmasi. Kan li l’ariv la-ba, banna la di ali : na dë médikaman dann lé kat médsin la di pran, i gingn pa done ali. Bin, akoz don ? Akoz la sékirité sosial i pran pa par. Kan li di li nana la mitièl, banna i réponn ali : si la sékirité i pran pa par, la mitièl i ranbours pa non pli.
Sa bann médikaman déranboursé. Déranboursé ? Sa lé a la mode sa : lané 2003, la déranbours katrovin ; lané 2005, san sinkante sis ; lané 2006, san sinkante dë ; lané 2007, karante ankor la soté. I prétan zot la pa vréman néséssèr akoz i fé pa tro d’bien. Spandan, i vann ankor in bonpé dann farmasi.
Bin la, lé ga, koman i fé ? Si ou nana lo pourkoi ? Ou ashté avèk out prop larzan. Si ou na poin lo pourkoi ? La lé mol. Ou pran pa, ou kontant aou avèk sak i done aou. Sansa, ou artourn konm lontan : ou pran tizane sinp. Si i fé pa d’bien, prièr bon dié k’i fé pa ou d’tor.

NB : Proshin foi na di dë mo dsi la franshiz.

Justin