Moin nana konm l’inprésyon, oplis nana moiyin pou inform demoun, oplis lo moun lé mal informé. Pétète pars i anbarass la tète avèk in bann z’afèr initil, pétète pars sak lé la pou informé i mète souvann-foi zot kaméra, sansa zot plime o sèrvis bann movèz koz. Dizon galman, lé pa fasil konète koman in l’informasyon i fé son shemin pou ariv, sansa pou pa ariv, dann la tète demoun.
Dépi in somènn, bann télé avèk bann gran zournal i bate tanbour déssi la késtyonn klassman nout bann piton-cirk-ranpar dann patrimoine l’imanité. Kroi amoin si zot i vé, kroi pa si zot i vé pa, mé moin na l’inprésyon demoun la pa vréman partisipe so z’afèr-la, té i atann pa sa pou d’bon, dizon la mazorité la pa gingn l’okazyon pou partaj projé-la, sansa pou di zot i vé pa. In pé ossi té pa la èk sa.
Mi vé pa dir lo bann prosédir, lo bann lankète lété pa fé. Mi pans mèm toute sak té i doi fèr la fé. Bin alor, pou kossa demoun konm k’i diré zot i koné pa vréman si sa lé bon, si sa lé pa bon, si va ansèrv kékshoz sansa non. Ankor in foi, l’informasyon la pa pass konm i dovré. La démokrasi la pa marsh konm k’i falé. Mi antann dir, éstèr i sava éspliké. Éstèr solman, akoz pa avan ? Moin na dan mo tète in vyé provèrb, nout bann z’ansyin té i ème dir pars sé in prékosyon k’i fo prann o séryé. Provèrb-la i di : « I ashète pa in sha dann in sak. Sansa in koshon dann goni ». Fransh vérité !

Justin